சிவன் - சைவம்

                                                     ஒம் நமசிவாய

     
சிவன் - சைவம்            

சைவம் என்றால் சிவத்தோடு சம்பந்தம் உடையது என்று பொருள் சிவம்- சைவம் (விஷ்ணு- வைணவம்,  புத்தர் -பவுத்தம் ). எப்படி சம்பந்தம் கொள்வது .பூஜை ,ஹோமம் தியானம் இவற்றின்  மூலமாக வைத்துக் கொள்ளலாம். 

          

சிவபெருமான் நமக்கு வேதங்களையும் ஆகமங்களையும் அருளியுள்ளார் .ஆனால் வேதங்களின் மூலம்  அவரை எளிதில் அணுக முடியாது,அதை மணிவாசக பெருமான் வேதங்கள் அய்யா என ஓங்கி ஆழ்ந்த அகன்ற நுண்ணியனே என்கிறார் , ஆனால் ஆகமமாகி நின்று அண்ணிப்பான் தாள் வாழ்க என்பதனால் ஆகமத்தின் மூலம் அணுகினால் இறைவன் நம்மை நெருங்கி வருவான் .அவனை வணங்க அவன் அருள் வேண்டும் இல்லை என்றால் நமக்கு அந்த கொடுப்பினை இருக்காது .அவன் அருளாலே அவன் தாள் வணங்கி என்பதன் மூலமும் புண்ணியம் செய்வார்க்கு பூவுண்டு நீருண்டு என்ற திருமூலர் திருவாக்கின் மூலமும் நமக்கு உணர்த்துகிறார் .

  

படைத்தலை பிரமனை கொண்டும்,காத்தலை திருமாலைக்கொண்டும்,ருத்ரனை கொண்டு அழித்தலையும்,அனந்த தேவர் மூலம் மறைத்தலையும்,சதாசிவமூர்த்தியாக அருளுவதையும் என ஐந்தொழில் புரிகிறார்.

சைவ சித்தாந்த வினைக்கொள்கையின்  படி ஆன்மா அழிவில்லாதது, மாயை ஆகிய இந்த உடல் மட்டும் அழியும், ஆன்மாவிற்கு அது செய்யும் பாவ புண்ணிய வினைக்கு ஏற்றவாறு அதற்கு மாயையில் இருந்து இன்னொரு உடல் கொடுக்கப்படும்.அது வினைக்கு ஏற்றவாறு உடனேவும் நிகழலாம் பல ஆண்டுகளும் ஆகலாம்,முக்தியும் கிடைக்கலாம்.

இன்று  இந்த பிறப்பே நமக்கு சாஸ்வதம் கிடையாது இந்த பெற்றோர்களுக்கே நாம் பிறப்போம் என்ற உறுதி கிடையாது எனவே உலகப்பற்றை குறைத்து பற்றற்றவன் மேல் பற்று வைத்தல் நன்று. அன்பே சிவம் என்பதன் பொருள் நாம் சிவனிடத்திலே அன்பு செலுத்த வேண்டும் என்று அர்த்தம்  நாம் காட்டும் அன்புக்கு ஈடாக அவர் நமக்கு அருளுவார், நாயன்மார்கள் அதனால் உயர்ந்தார்கள். யாரும் யார் மீதும் குரோதம் வேண்டாம், உயிர்பலி வேண்டாம். யார் எவ்வளவு உயர்ந்த ஞானம் கைவரப்பெற்ற வர்களுக்கும் ஆலய வழிபாடு அவசியம் என்பதையே திருமுறையை அருளிய  ஆசிரியர்கள் உணர்த்தினார்கள் அவர்கள் யாரும் வீட்டில் அமர்ந்து பதிகங்கள் பாடவில்லை.ஆலயம் சென்றே தொழுதார்கள் அவர்களின் வழியில் நாமும் சென்று நம் பிறவி தூய்மை பெறுவோம்.

சிவபெருமானே முழுமுதல் கடவுள் அவன் ஆதியும் அந்தமும் இல்லாதவன்,பிறப்பு இறப்பு இல்லாதவன், மால்,அயன் இந்திரன் முதலானோர் தேடியும் கிடைக்கா தனிப் பெரும் தலைவன்.மக்கள் மட்டுமின்றி புல் முதல் விலங்குகள் வரை அனைத்தும் அவனை வழிபட்டுக்கொண்டே உள்ளன. இப்பிறவி தப்பினால் இனி எப்பிறவி வாய்க்கும்? இப்பேறு பெற பிற சமயத்தில் பிறந்தவர்கள் ஒரு நாள் சைவத்தில் சார்ந்து சிவபூசை செய்து தான் முக்தி எனும் வீடு பேறு  பெறுவர்.எந்த தாயின் வயிற்றிலும் பிறவாதவன்  அவனே அனைத்திற்கும் மூலமானவன்,84 லட்சம் யோனி பேதம் எனும் ஜீவராசிகளின் கர்த்தா, ஆகமங்களையும் வேதங்களையும் உலகை சிருஷ்டித்த அன்றே அருளி வாழ்க்கை முறையை அளித்தவன்.ஜீவராசிகளின் பொருட்டு நஞ்சை உண்ட கருணைக்கடல்.  யுகயுகமாக இருக்கும் சைவம். சிவபெருமான் அவனை காலத்தால் அளவிட முடியுமா,அது பசுபிக் மகாசமுத்திரத்தை கையால் அளப்பது போலவாகும்.

சைவத்தின்மேல்சமயம்வேறில்லை. மேன்மைகொள் சைவநீதி  விளங்குக உலகமெலாம் .              

   

                      

                             போற்றி  ஓம் நமசிவாய


                                   திருச்சிற்றம்பலம்